Sóm 69 
                          Sové mwen Bondié, pas' mwen ni dlo jiskan kou mwen.
1 An chanté David
2 Ô Bondié, sové mwen, pas' mwen ni dlo jiskan kou mwen!
3 Mwen ka anfonsé adan an trou ki plen épi labou, é mwen pani ayen, pou mwen ritjenn kó mwen.
Mwen ka koulé adan dlo-a, pas' i two fon, é kouran-an, ka chayé mwen.
4 mwen las', afós mwen za kriyé, gój mwen ka brilé mwen,
Zié mwen ka fatigé, afós atann-ou Mondié.
5 Sé moun'lan ki rayi mwen , san rézon-an, plis' pasé chivé ki an tèt mwen.
Sa mwen pa vólè, èske mwen pé rann li ?
6 Ô Bondié, ou konnèt bétiz mwen, é pyès fót mwen pa kaché douvan'w.
7 Sényeur, Bondié de tout'lunivèr, mwen pa sé anvi ke moun ki ka konté asouw, tonbé dan la wont' akoz di mwen.
Bondié izrayèl, ke pèsonn pa ensilté moun ki ka chèchéw akoz di mwen!
8 Pouw, mwen ka sipóté ensilt, la wont' ka kouvè fidji mwen.
9 Mwen vini kon an nétwanjé pou sé fwè mwen yan, an moun enconu pou sé yich manman mwen yan.
10 Wi, gwan lanmou-an, mwen ni pou mézon'w lan, ka bwilé mwen, kon an difé, é sé ensilt la, ke sé moun'lan ka fèw la, ka tonbé anlè mwen.
11 Lè mwen ka pléré é lè mwen ka jeuné, moun ka ensilté mwen,
12 Lè mwen ka mété an lenj dèy anlè mwen, yo ka motjé kó yo di mwen.
13 Sé moun'lan ki asiz anlè plas' piblik la, ka palé mwen mal,
É sé tala ki ka bwè ya, ka fè chanté asou mwen.
14 É mwen, mwen ka priyéw, Bondié, i za lè pouw kouté mwen.
Ô Mondié, lanmouw twè  gwan, réponn mwen!
Wi, ou sé vrèman sovè mwen.
15 Pa kité mwen anfonsé an labou-a,
Tiré mwen an didan'y!
Raché mwen di lanmen sé moun'lan ki ka détèsté mwen yan, é di dlo fon tala!
16 Ke dlo-a pa antréné mwen an kouran'y lan,
Ke twou-a pa valé mwen,
Ke tonnb lan, pa fèmen kóy anlè mwen!
17 Bondié, réponn mwen! Wi, lanmouw ka fè mwen di byen.
Adan gwan tandrès ou-a, jété ziéw anlè mwen!
18 Pa kaché fidjiw ba sèrvitéw la.
Mwen twè maléré, réponn mwen vit!
19 Vini bó mwen, sové lavi mwen!
Akoz di lènmi mwen, libéré mwen!
20 Ou sav, ke yo ka ensilté mwen, yo ka tiré lonè mwen, yo ka kouvè mwen épi la wont'.
Tout' sé zènmi mwen yan, yo la, douvan'w.
21 Ensilt la, blésé mwen, mwen pépa djéri.
Mwen téka atann an jès damitié, mé pani ayen ka vini.
Mwen ka chèché an moun pou ankourajé mwen, mé mwen paka trouvé pèsonn.
22 Moun kité swadizan ami mwen, mété pwazon an manjé mwen,
É lè mwen swèf, yo ka fè mwen bwè vinèg.
23 ke sé bon manjé yo-a, vini an pièj ba yo, mé osi pou sé zenvité yo-a tou!
24 Ke zié yo paka wè klè ankó, ke yo vini avèg!
Fè yo kourbé do yo tout'lè!
25 Vwéyé gwan kolèw-ou-a anlè yo,
Pouw brilé yo kon an difé!
26 Détwi kan yo-a,
Ke pèsonn pa alé abité anba tant' yo-a!
27 Moun'lan ke ou za frapé ya, yo ka fèy soufè ankó plis.
Yo ka ajouté soufrans ankó , a sé moun'lan ke ou za blésé ya.
28 Mété tout fót yo anlè do yo, pa pardoné yo ankó!
29 Éfasé non yo adan liv sé vivan-an,
Pa konté yo parmi moun ki ka obéyiw!
30 Mwen, mwen maléré é mwen ka soufè, mé sekouw ou, ké protéjé mwen, ô mondié.
31 Mwen ké chanté non Bondié, mwen ké di koumanniè i gwan, é mwen ké diy mèsi.
32 Lwanj ka fè Bondié plis plézi ki an bèf,
Ki an toro épi kón épi sabo.
33 Léw ka wè sa, sé moun senp'lan dan la jwa.
Long' vi a zót ki ka chéché Bondié!
34 Wi, Bondié ka kouté moun ki póv,
i paka rijété zanmiy, lè yo an prizon.
35 Syèl épi tè, é zót, sé lanmé ya, épi tousa ki ka brennen an didan zót,
Chanté lwanj Bondié!
36 Wi, Bondié ké sové Jéruzalèm, i ké rikonstwi sé vil Juda-a.
Pép li ya ké enstalé kóy, é yo ké ripwan posésyon.
37 Sé tjanmay Bondié ya, ké risouvrè sé vil tala an partaj,
É sé moun'lan ki anmen Bondié ya, ké abité koté tala.